Alumnado do Grove recibe mañá o seu bautismo de mar dentro do Campionato Surf Rías Baixas Pro que se disputa na Lanzada

Fecha: 2014-04-10

• A Concellería de Educación repartiu 250 prazas entre a rapazada de primaria e secundaria do municipio

Un total de 250 alumnos de primaria e secundaria do Grove participarán mañá nos bautismos de mar que ofrece a organización do Campionato Surf Rías Baixas Pro na praia da Lanzada.

A Concellería de Educación do Concello do Grove repartiu as prazas entre os colexios e institutos da localidade. Deste xeito, mañá de 11.00 a 13.00 horas é a quenda do alumnado do IES Monte da Vila, que se desprazará ata a praia acompañado polos seus profesores. Xa pola tarde, de 16.00 a 18.00 horas, será a vez do alumnado de primaria (maior de 9) anos dos colexios Valle-Inclán, Rosalía de Castro, Conmeniño e As Bizocas, e do IES As Bizocas.