O Concello do Grove presenta o programa do Entroido 2018
Fecha: 2018-01-23
Na rolda de prensa que tivo lugar na mañá de hoxe incidiuse na importancia social e económica que ten acadado unha das festas máis tradicionais e importantes do Grove.
O Concello do Grove presentou esta mañá a programación dos dez días que durará o Entroido na vila. As celebracións comezarán co Xoves de Comadres e Compadres e rematará co Entroido en San Vicente, ademais do xa tradicional concurso de disfraces para mascotas. As citas obrigadas están no Festival de Comparsas e no Desfile do Martes no Sambódromo Meco. O programa caracterízase por unha ampla oferta de actividades para os máis pequenos, ademais da novidade da Festa de San Valentín do Entroido.
O Concello do Grove destina aproximadamente 30.000 euros de orzamento á celebración do Entroido, dos que case 9.000 van destinados aos premios, tanto das Comparsas como do Festival de disfraces. Desde o goberno local incídese no total apoio a esta celebración que se ten posicionado como unha das mellores de Galicia, ao tempo que permite a dinamización da vila durante o mes de febreiro.