O CONCELLO DO GROVE ACOMETE UNHA ACTUACIÓN SUBVENCIONADA POLO IDAE QUE SUPORÁ UN IMPORTANTE AFORRO ENERXÉTICO

Fecha: 2020-09-30

O Concello investirá máis de 98.000 euros, dos cales o 80% procede dos fondos do IDAE, o 10% da Deputación de Pontevedra e o 10% restante de fondos propios.

O Concello do Grove poñerá en marcha nas próximas semanas un importantísimo plan de aforro enerxético que terá unha repercusión moi positiva no gasto que se realiza. A mellora da eficiencia enerxética centrarase nos coñecidos bombeos da rede de subministración que son, hoxe por hoxe, unha das áreas que consomen máis enerxía e supón, ademais, unha mellora no relativo ao abastecemento, algo que no Grove presentaba carencias acumuladas durante décadas de abandono.

Os bombeos nos que se actuará serán os do Corgo, o de Terra de Porto, o do Porto de Meloxo, o de Pedras Negras, o de Raeiros, o situado nas inmediacións do Pirata en San Vicente, en Montemar, na praia de Area Grande e na praia de Area das Pipas. O custo da intervención en cada un deles oscila entre os 8.000 e os 12.000 euros e a subvención conseguida do Instituto para a Diversificación e Aforro da Enerxía (IDAE), dependente do Ministerio para a Transición Ecolóxica, cobre o 80% cunha achega de 78.506,56 euros. A Deputación de Pontevedra, a través do Plan Concellos, proporcionará 9.813,32 euros, a mesma cantidade que achegará o Concello dende os seus orzamentos municipais.

O Concello do Grove destaca a importancia desta intervención que, a pesar de non ser visible de forma externa, implica unha mellora cualitativa tanto na rede de abastecemento como no aforro de gastos do municipio. O compromiso do goberno actual con actuacións deste tipo quere solucionar moitos anos de descoido de todo aquilo que non era visible, que ten suposto que, a día de hoxe, O Grove se enfronte a unha rede de abastecementos antiga e precaria que, pouco a pouco, se deberá ir modernizando.