O Concello presenta as contas da Festa do Marisco no Consello Local de Turismo

Fecha: 2016-01-18

A contas faranse públicas nun encontro coa veciñanza nos vindeiros días.

O Consello Local de Turismo mantivo onte a súa primeira reunión do ano 2016 tendo como punto principal da súa orde do día a presentación das Contas da Festa do Marisco. Na reunión, que comezou ás 17.30 horas, deuse conta do peche de orzamento de turismo, incidindo nos gastos existentes durante o ano 2015 e debateuse sobre a participación no Grove nas feiras de Turismo debido ao elevado custo que isto supón. No relativo ás Festa da Centola, emprazouse a realizar unha reunión específica para falar deste evento e os seus resultados. 

Logo dese debate, presentouse un amplo informe que analiza os gastos e ingresos da Festa do Marisco desde o ano 2011 e incide nos problemas detectados no relativo a algunhas partidas tentando indicar posibles solucións que optimicen os recursos. Ademais da revisión do histórico da Festa, deuse cumprida conta dos datos de 2015 partida a partida, facilitando a relación de facturas e a listaxe de gastos e ingresos. Deste xeito, a LII edición da Festa péchase cuns gastos de 497.956,10 euros, que inclúen algunhas facturas de 2014 e máis de 13.000 euros de pagos pendentes á SGAE. 

No capítulo de ingresos, a través das vendas da Festa, tanto do produto como da tenda, as subvencións, os patrocinios e concursos foron facturados 424.023,75 euros. Isto supón un saldo negativo de 73.932,35 euros. Inda que a Festa se segue situando en perdas, aplicouse unha corrección moi importante con respecto aos anos anteriores, como se pode apreciar na táboa adxunta. 

Desde o Concello do Grove estableceuse un compromiso co Consello Local de Turismo para seguir traballando na liña marcada co obxectivo claro de conseguir unha Festa do Marisco con déficit cero. Ademais, e segundo o compromiso adquirido, as contas serán presentadas pormenorizadamente aos veciños e veciñas e, posteriormente, postas á disposición no apartado de transparencia da web do Concello. 

Táboa. Evolución de resultados da Festa do Marisco do Grove