Actividades lúdico-deportivas para a xente nova

Fecha: 2014-03-06

A Concellería de Xuventude organiza unha xornada de actividades de lecer e deporte dirixidas á rapazada de entre 10 e 15 anos. En caso de quedaren prazas dispoñibles, poderán participar rapaces e rapazas doutras idades, sempre maiores de 6 anos.

A cita será o sábado 15 de marzo, de 11.00 a 13.30 horas, na praza do Corgo.

As actividades estarán dirixidas pola Escola de Tempo Libre Dajalca co equipo de 21 alumnos e alumnas que están realizando o curso de Monitor de Ocio e Tempo Libre a través desta concellería.

Será unha mañá de xogos lúdicos e deportivos en forma de xincana, onde os participantes irán rotando polos distintos obradoiros propostos para fomentar o traballo en grupo, os valores de amizade e cooperación e participar en actividades de lecer e tempo libre.

Entre as actividades que se van realizar están as seguintes:

• Obradoiro de xogos de paracaídas: diversos xogos de presentación e xogos dinámicos co paracaídas.

• Obradoiro de xogos pre-deportivos: xogos pre-deportivos como o “pase de 10” e “partido de brilé”.

• Xogos de movemento e deportes, onde se dividirán os participantes en 2 grupos para realizar un mini-torneo.

• Obradoiro de xogos de relevos: tales como o “xogo das pinzas” ou o “traslado de obxectos”.

• Obradoiro de grandes xogos tradicionais, onde evocaremos os xogos de antes e mesturarémolos co deporte, xogos como as “carreiras de sacos” ou o “xogo do pano”.

• Xogos musicais: como o “xogo das cadeiras” e xogos de exterior musicais tales como “as apertas” ou “as estatuas”.

Ademais, haberá un taller permanente de maquillaxe de fantasía. 

As rapazas e os rapaces interesados deberán inscribirse previamente na OMIX (Casa Azul) ata o mércores 13 de marzo (o mércores estamos tamén de tarde, de 16.00 a 20.00 h). Poden facelo persoalmente, por teléfono (986 730 609) ou por correo electrónico: omix@concellodogrove.com