Comeza unha nova edición dos talleres de técnicas de estudo postos en marcha pola concellería de educación

Fecha: 2014-05-02

Son gratuítos e están destinados para o alumnado e os seus pais ou nais

Forma parte dun paquete de accións destinadas a mellorar o rendemento académico e reducir o fracaso escolar

A Concellería de Educación do Grove inaugurou unha nova edición dos talleres de Técnicas de Estudo coa participación de catro alumnos de secundaria e dos seus respectivos pais ou nais. Os talleres, que se desenvolven os mércores e xoves no Edificio de Usos Múltiples do Concello do Grove, teñen como obxectivo preparar o alumnado para superar con éxito o curso escolar.

Os talleres son gratuítos e desenvólvense en grupos de catro alumnos, tendo en conta os cursos, cos seus respectivos pais. Con este programa, desde a concellería de Educación preténdese mellorar os hábitos de estudo e o rendemento académico dos estudantes, pero tamén implicar aos pais e ás nais. Así, mentres o alumnado recibe unha maior motivación cara ao estudo, mellorando o seu rendemento escolar e traballando aspectos de prevención ante o fracaso e o absentismo escolar, os pais e as nais coñecen cales son os hábitos e as técnicas que deben mellorar o alumnado nas súas casas durante o tempo de estudo.

Durante as sete sesións que conforman cada taller de Técnicas de Estudo, traballaranse aspectos como a atención selectiva, a atención mantida, o autocontrol mediante auto-instrucións, a memoria, neutralizar elementos distractores, resolución de problemas nos exercicios e bloqueos nos exames.

Evitar o fracaso escolar

Os talleres de técnicas de estudo súmanse a un paquete de actuacións postas en marcha pola Concellería de Educación co obxectivo de mellorar o rendemento académico do alumnado e reducir o fracaso e abandono escolar. Así, ademais desta actividade, impártense clases gratuítas de apoio escolar entre alumnado de secundaria e nos institutos ofrécese o programa Inclusión Escolar, destinado ao alumnado expulsado do centro.

A través das clases de apoio, nas que participan un total de 24 alumnos, ofrécense instrumentos para minimizar as carencias detectadas en cada un dos participantes, recuperar as materias non superadas e implantar en cada alumno unhas habilidades e mentalidade de traballo autónomo de cara ao futuro. A gratuidade do programa permite que participen neste apoio escolar alumnos que doutro xeito non poderían telo recibido.

O programa Inclusión Escolar, que funciona por segundo curso consecutivo, está destinado ao alumnado da ESO. A través deste programa, preténdese ofrecer unha alternativa ao alumnado ante a súa expulsión do centro, evitando que a expulsión se converta nunha oportunidade para pasar a mañá só nas súa casa.