As revisións de gas

Fecha: 2010-07-28

Ante as dúbidas presentadas por diversos consumidores e consumidoras sobre as revisións de gas, sería interesante atender unha serie de recomendacións para evitar no posible as fraudes:

• As revisións deben ser realizadas por persoal técnico autorizado e deben acreditalo co carné de instalador de gas autorizado pola Xunta de Galicia.
• As revisións obrigatorias periódicas realízanse cada cinco anos. Nas gomas aparece indicada a data de caducidade; en relación ao regulador e ás abrazadeiras, non teñen data concreta de caducidade, deben cambiarse polo seu estado ou por avaría, nese caso teñen dereito e quedar coas antigas, isto é importante no caso de ter que reclamar posteriormente.
• Ao finalizar  a revisión deben entregarlles un certificado de revisión periódica, e o contrato de mantemento,  que deben gardar. Normalmente colocan un adhesivo que indica a data da próxima revisión.
• En caso de que acuda unha empresa sen telo solicitado, non están obrigados a aceptar o servizo.
• Antes de iniciar a revisión, solicite as tarifas que lle van cobrar, compare con outras empresas. Recoméndase que a empresa seleccionada estea adherida ao Sistema Arbitral de Consumo.
• Esixa unha factura detallada.

En caso de dúbidas, poden achegarse á Oficina de Información ao Consumidor, na rúa Castelao, 173, baixo.