Chelo Suárez faise co Premio Lueiro deste ano

Fecha: 2010-09-06

A coruñesa Chelo Suárez recibiu con sorpresa e alegría o XVII Premio de Novela Curta Manuel Lueiro Rey pola súa obra As horas rotas. O galardón, dotado con 3 000 euros, decidiuse o pasado sábado na Casa do Concello do Grove.

O xurado do certame resaltou que se trata dunha novela ambientada "na guerra civil española, pero no que destaca a poética coa que é tratada desde o punto de vista dunha muller que padece as consecuencias do inicio da guerra civil, vendo como se tronzan as súas esperanzas e ilusións; e desde o punto de vista dun guerrilleiro que entrega a súa vida no que considera unha causa xusta". O escritor e profesor Manuel Quintáns, presidente do xurado, destacou o lirismo e a poética dos puntos de vista dos personaxes da novela.