Primeiro paso cara ao aparcadoiro subterráneo do Corgo

Fecha: 2010-09-17

O alcalde do Grove, José A. Cacabelos, reuniuse onte co presidente de Portos de Galicia, José M. Álvarez-Campana, quen se comprometeu a promover a construción dun aparcadoiro subterráneo nos terreos competencia dese ente autonómico no Corgo. Así pois,  o presidente de Portos anunciou que a semana próxima comezarán a preparar os pregos e planos necesarios para definir o estudo do devandito aparcadoiro.

Outro tema que se tocou na xuntanza foi o do porto deportivo. Verbo disto, Álvarez-Campana anunciou que Portos está a redactar varias alternativas para esas instalacións e comprometeuse a vir ao Grove en novembro para presentárllelas á corporación e aos diversos colectivos de usuarios do porto, co fin de recoller as súas opinións antes de redactar o definitivo proxecto construtivo.