AS ACTIVIDADES DE DINAMIZACIÓN LECTORA DA BIBLIOTECA MUNICIPAL DO GROVE ACADAN O MÁXIMO RECOÑECEMENTO A NIVEL NACIONAL

Fecha: 2021-10-18

A biblioteca foi galardoada cun dos 10 premios especiais do María Moliner 2021 polo programa “A biblioteca, un punto de apoio para a comunidade”.

A puntuación obtida sitúaa entre as 10 mellores de toda España e a mellor de Galicia.

As actividades de dinamización lectora desenvolvidas na biblioteca municipal do Grove acadan o máximo recoñecemento a nivel nacional. O programa de dinamización lectora “A biblioteca, un punto de apoio para a comunidade” desenvolvido en 2021 acada o maior recoñecemento no Concurso de proxectos de animación á lectura María Moliner, o que supón un aporte económico de 10.000 € para a biblioteca.

En virtude do apartado undécimo, punto 2, da orde de convocatoria, os dez proxectos coas puntuacións máis altas serán propostos como beneficiarios dos dez premios en metálico de 10.000 euros e, nese sentido, o proxecto da biblioteca municipal do Grove foi proposto pola comisión de valoración como beneficiaria dun destes dez premios especiais.

O programa premiado foi desenvolvido pola biblioteca durante os seis primeiros meses do 2021 co obxectivo principal de garantir a utilidade da biblioteca á comunidade e o seu papel como facilitadora de servizos de lectura, de información e de entretemento pero, sobre todo, de apoio emocional e social.