O AUDITORIO DO GROVE DEDICA A PROGRAMACIÓN DO 2º SEMESTRE DE 2025 DA REDE GALEGA DE TEATROS Á COMEDIA

Fecha: 2025-09-01

O Grove, 1 de setembro de 2025.- O Auditorio do Grove ofrecerá durante o segundo semestre do 2025 da Rede Galega de Teatros e Auditorios un ciclo de teatro dedicado á comedia co fin de entreter e provocar a risa das persoas asistentes.

En total ofreceranse catro obras de teatro de diferentes temáticas. O ciclo dará comezo o 20 de setembro e rematará o 14 de decembro.

Neura. 20 de setembro, 20.30 h

Comedia neurótico-festiva, recomendada para maiores de 12 anos, que aborda o tema da saúde mental. Iso si, con minúsculas. Os nosos protagonistas conviven con teimas propias e alleas. Algunhas delas tentan escondelas mentres exhiben outras orgullosos. Ás veces toléranas, en ocasións búscanlles tratamento, pero sempre sofren por elas.

Neura non é unha comedia romántica: Edu e Sonia, xa viviron no pasado a súa historia de amor e desamor. Unha historia que terminou precisamente por mor deses pequenos trastornos. Non son amigos, non son amantes. Son esa categoría difusa á que chamamos “ ex”. Xente da que sabemo sata o seu grupo sanguíneo, pero coa que nos comportamos coma se fosen perfectos descoñecidos.

Os azares da vida fan que se volvan a atopar en distintas circunstancias. Obrigados unha vez máis a poñer a proba a compatibilidade das súas neuras.

As R(humorosas). 18 de outubro, 20.30 h

Proposta teatral cómica onde 3 actrices poñen en valor as grandes mulleres da historia galega nun contexto fresco, orixinal, divertido e moi innovador.

Que dirían María Pita, Rosalía de Castro ou Isabel Zendalse fosen cómicas hoxe en día? Isto é o que Ledicia Sola, Marta Doviro e Carmen Méndez preguntáronse como premisa para empezar a construír este espectáculo.

Sabemos algunhas cousas que se din delas nos libros, pero que contarían elas de si mesmas se puideran falar? Marta, Carmen e Alegría danlles voz a estas e outras mulleres ilustres de Galicia a través de situacións imaxinarias como unha entrevista no SEPE, un programa de murmuración ou un cásting. Todas estas situacións en clave de humor expóñense coa idea de xogar, imaxinar e sobre todo deixarlles falar ao máis puro estilo micro aberto para coñecelas un pouco mellor.

Nun formato que mestura os monólogos con sketches cómicos e mesmo música, achegámonos aos detalles máis descoñecidos de grandes nomes como Emilia Pardo Bazán, María Casares ou mesmo lendas como a de Pepa A Loba. Todas elas terán que postularse e facer valer os seus méritos para ser coñecidas e recoñecidas para toda a sociedade.

O que hai que ver. 15 de novembro, 20.30 h

Espectáculo de comedia que conta, en clave satírica, unha serie de historias nas que o humor se funde co teatro para crear un cóctel explosivo destinado a lograr que os espectadores «estoupen coa risa».

Os actores e creadores Marcos Alonso, Suso Pando e Manuel Pombal idearon para esta proposta escénica unha combinación dalgúns dos mellores sketches da historia de Fulano, Mengano e Citano, aos que sumaron outros de nova creación aos que se lle engaden unha serie de cancións orixinais cargadas de ironía.

Así crean, en conxunto, un todo variado, dinámico e sorprendente, seguindo a liña de humor que caracteriza á compañía viguesa que desde 1995 desenvolve unha interesante traxectoria centrada no territorio galego

Go on!. 14 de decembro, 19.30 h

A compañía de teatro Malasombra volve ó Auditorio de O Grove, agora coa representación da obra cómica teatral GO ON !, unha odisea cómica escrita por José Luis Prieto e dirixida por Marcos Orsi na que os actores Xoque Carbajal e Jouse García interpretarán a dous exploradores espaciais que entraron nas descoñecidas terras galaicas a través da ruta xacobea.

Despois da chegada do home á lúa, á humanidade só lle quedaba un reto: a chegada do home a Galicia. No ano 2010 (ano 25 despois de Gayoso) dous intrépidos exploradores tiveron o valor de adentrarse nas descoñecidas terras galaicas a través da Rúa Xacobea.

As entradas para asistir aos diferentes espectáculos poderán adquirirse na Biblioteca Municipal ou no propio Auditorio do Grove nas datas que se indicarán antes das representacións.