Excelente aceptación da poboación aos novos servizos ofrecidos pola biblioteca municipal

Fecha: 2011-11-14

O novo modelo organizativo implantado na biblioteca municipal do Grove comeza a dar os primeiros froitos e os cambios realizados son recompensados cun notable aumento no número de visitantes e usuarios dos diferentes servizos.

Desde o pasado mes de xuño apostouse de xeito firme por fomentar o uso das dúas bibliotecas municipais, polo que foi necesario emprender unha serie de cambios para facelas máis funcionais e adaptadas ás necesidades cambiantes da cidadanía, incrementando os seus servizos. Estes cambios fóronse realizando paulatinamente e incluíron:

• Reorganización de todos os espazos da biblioteca, separando a aula de estudo para unha zona máis tranquila.

• Adecuación dunha aula infantil, con novo mobiliario e zona de bebeteca, que foi inaugurada recentemente coincidindo co aniversario da biblioteca.

• Reimplantación do acceso público a Internet, con ordenadores de uso público e contratación dunha liña Wi-Fi para os usuarios.

• Novos servizos: formación de usuarios, dinamización lectora, servizo de referencia especializada, sección de novidades e libros máis lidos...

Asemade, comezouse a poñer en marcha unha política de actualización dos fondos, sobre todo no relativo a adquisición de literatura infantil e xuvenil, narrativa e best-sellers en castelán e en galego.

En apenas catro meses, conseguiuse un considerable incremento da colección, que repercutiu nun notable aumento de novos usuarios e na volta de lectores ao servizo de préstamo.

Os datos

A zona da bebeteca converteuse nunha das que recibe máis visitantes, grazas á implicación dos pais e das nais, que cada día acompañan os pequenos e pequenas e pasaren unhas horas de lecer compartindo lecturas e actividades.

Tamén creceu considerablemente o número de usuarios do servizo de préstamo, que poden facer as súas suxestións de adquisición a través das desideratas ou do persoal da biblioteca.

A disposición de ordenadores de uso público e a posta en marcha dunha rede Wi-Fi estable e sen limitación horaria son outros servizos que atraen novos usuarios para realizar traballos, consultar o correo electrónico, ler a prensa diaria ou consultar ofertas de emprego, entre outros.

Pese aos logros, a Rede de Bibliotecas do Grove, dependente da Concellería de Novas Tecnoloxías, Documentación e Patrimonio, non descansa e segue a traballar para incorporarse ao actual modelo de biblioteca: a biblioteca como produtora, provedora e democratizadora da información; como espazo de formación e desenvolvemento persoal e como punto de encontro e espazo cultural de proximidade.