Alumnado de infantil das escolas Monte da Vila e Rosalía de Castro participan nun obradoiro de xoguetes

Fecha: 2011-11-29

O Concello do Grove, en colaboración co Instituto Galego de Consumo, acolle o venres 2 de decembro o programa InfonadalConsumo, que consiste en impartir talleres de elaboración de xoguetes para os máis pequenos e un obradoiro sobre a seguridade dos xoguetes para as nais e os pais dos alumnos.

Preto de noventa alumnos de 3 a 5 anos participarán o venres no taller de elaboración de xoguetes, que se desenvolverá durante a xornada escolar na escola infantil Monte da Vila e no CEIP Rosalía de Castro. A segunda parte da actividade organizarase o venres pola tarde, ás 17.30 horas, na Casa da Cultura Manuel Lueiro Rey. As nais e os pais asistirán a un seminario que resolverá todas as dúbidas existentes sobre a seguridade dos xoguetes e as características que deben ter para adaptárense ás necesidades dos seus fillos.

As persoas que queiran participar pódense inscribir na Oficina Municipal de Información ao Consumidor, na Casa Azul; no teléfono 986 730 609 ou no enderezo electrónico omic@concellodogrove.com. Desde o Concello do Grove animan a todos os pais e nais a participaren nesta actividade, xa que o Nadal está preto e con el a época do ano máis propicia para elixir e mercar os xoguetes.

Esta actividade forma parte da Guía de actividades municipais para centros escolares, elaborada polo Concello do Grove. O obxectivo desta guía é reunir, nun só documento, toda a información sobre a oferta municipal de actividades escolares, co obxectivo de potenciar e facilitar a participación de toda a comunidade educativa da localidade. Xa son varios centros os que fixeron as súas solicitudes para o curso e así, ademais de talleres de consumo, tamén se organizarán actividades de primeiros auxilios, educación viaria, etnografía y concursos de relatos...