Achégate á Rede de Bibliotecas do Grove, nova campaña de animación á lectura

Fecha: 2012-01-16

A Rede de Bibliotecas do Grove acaba de poñer en marcha unha nova campaña  de dinamización lectora que ten como obxectivo impulsar o servizo de préstamo nas bibliotecas da Rede e fomentar a lectura entre os seus usuarios e usuarias.

A nova campaña consiste en que cada socio ou socia da biblioteca que utilice o servizo de préstamo das bibliotecas será agasallado cunha bolsa, para transportar os libros, serigrafada co lema da campaña e o logo do Concello do Grove, a escoller entre dous modelos: de asas ou tipo mochila O lema da campaña é Achégate á Rede de bibliotecas do Grove. Estámoste esperando. Non lle deas máis voltas.

O éxito das iniciativas postas en marcha ata agora xa se reflectiron nun considerable aumento do número de usuarios da biblioteca municipal con respecto a anos anteriores e do número de documentos solicitados en préstamo, sobre todo no referente ao préstamo de libros da sección infantil e na de novidades.  Con esta nova campaña preténdese seguir mellorando na prestación e calidade dos servizos e aumentando o seu número de usuarios.

Así mesmo, co fin de completar a informatización e dixitalización da xestión bibliotecaria, estase a levar a cabo unha campaña de renovación do carné de biblioteca, substituíndo os carnés tradicionais por outros con código de barras que facilitarán a realización do préstamo de forma automatizada.