En hora boa a todas as mulleres

Fecha: 2012-03-08

O Centro de Información ás Mulleres (CIM) felicita hoxe a todas as mulleres co gallo do Día Internacional polos Dereitos da Muller e a Paz Internacional, proclamado pola Organización das Nacións Unidas en 1977.

Conmemoramos hoxe a loita das mulleres pola nosa participación en pé de igualdade co home na sociedade e no noso desenvolvemento íntegro como persoas.

Igualdade de oportunidades real no emprego, nos salarios, na saúde sexual e reprodutiva, na planificación familiar, na conciliación dos tempos de traballo, na autonomía de decidir sobre o noso corpo... Porque aínda queda moito por andar, grazas por seguir loitando por ti, por nós, por todas.

Para festexar este día propómosvos:

Visitar:

• Os fondos bibliográficos en materia de igualdade da Biblioteca Municipal

• A exposición O Grove, Feminino Plural (2008) na Casa da Cultura Manuel Lueiro Rey

Ver:

• Ágora (2009). Dir. Alejandro Amenábar. Historia de Hipatia de Alexandría, filósofa e mestra exipcia que destacou nos comezos do século V polos seus coñecementos sobre matemáticas e astronomía.

• Pan e rosas (Bread and roses) (2000). Dir. Ken Loach. Sobre as desigualdades laborais e sociais nos EE UU e a explotación de las persoas encargadas da limpeza nun edificio dos Ánxeles e a súa loita por mellorar as condicións laborais, así como o dereito a sindicarse.

• Criadas e señoras (The help) (2011). Dir. Tate Taylor. Década dos 60, clases e discriminación racial.

Oír:

• Estrella Morente. Mujeres. 2006.

• Pj Harvey. Let Engand Shake. 2011. Island Records

Ademais, hoxe, ás 20:00 h na casa da cultura do Grove preséntanse as actividades da Concellaría de Igualdade, proclámanse as galardoadas dos Premios Meca 2012 e lese un manifesto.

Que teñades un bo día.