Os provedores do Concello do Grove xa poden dar a súa aceptación de acollerse ao mecanismo de pagamento establecido polo Goberno

Fecha: 2012-04-04

O pasado 15 de marzo foille enviada ao Ministerio de Facenda a relación certificada coas obrigas do Concello pendentes de pagamento aos provedores, que ascenden a un total de 812.259,93 € (excluídas as débedas coas entidades públicas).

O concelleiro de Economía, Facenda e Persoal do Grove, Juan Luis Callón Cameán, informa de que, co obxecto do cumprimento do Real decreto-lei 4/2012, polo que se determinan obrigas de información e procedementos necesarios para establecer un mecanismo de financiamento para o pagamento aos provedores das entidades locais, os provedores e contratistas poden dar desde hoxe a súa aceptación de acollérense ao mecanismo de pagamento establecido polo citado RDL durante un período que vai ata o próximo día 22 de abril de 2012.

Esta aceptación de acollerse ao citado mecanismo de pagamento pódese realizar de 2 formas diferentes:

• Vía telemática, con acceso á aplicación informática centralizada na páxina web da Axencia Tributaria.
• Vía presencial, dirixíndose ao Concello do Grove e comunicándoo a través dun Escrito de Aceptación para presentar no Rexistro xeral.

A información que deben achegar os provedores no Escrito de Aceptación, por calquera das 2 vías que utilicen, será: o número de conta corrente con IBAN e BIC, unha descrición da natureza da Peme ou autónomo segundo a AEAT e o importe da cantidade principal para aboar descontado o importe da quita, se así se establecera. Igualmente, infórmase de que o Ministerio de Facenda ten ata o 30 de abril de 2012 para valorar o Plan de Axuste aprobado polo Concello o pasado 29/03/2012, e no caso de que así sexa, durante a primeira quincena de maio o Pleno deberá aprobar a formalización da citada operación de endebedamento para o pagamento aos provedores. Cómpre destacar que a cantidade inicial de 812.259,93 € poida ser aumentada, xa que os provedores que non foron incluídos na relación de obrigas enviada ao Ministerio de Facenda inicialmente poden solicitar a súa inclusión nesta operación de pagamento durante este período citado que vai ata o 22 de abril de 2012.

Segundo o calendario establecido polo Ministerio de Facenda, e logo de que se realicen todas as tarefas de comprobación das obrigas reais de pagamento existentes, está previsto que se poidan aboar estas débedas a partir da segunda quincena do mes de maio de 2012.