Os comerciantes aproban as melloras na iluminación que o Concello fixo nas rúas Luís Casais, Luís Seoane e O Mariño
Fecha: 2012-07-19
O concelleiro Manuel Ochoa, anuncia que se valorará o tipo de luminaria e potencia con que se dotará a rúa Castelao, que recibiu un suspenso
O Concello de Grove acaba de recibir os resultados dunha enquisa encargada á Asociación de Empresarios de Bens e Servizos do Grove –Emgrobes- co obxectivo de coñecer a súa opinión sobre a calidade da iluminación en catro rúas comerciais do centro urbano. A valoración fíxose sobre as rúas Luís Casais, Luís Seoane, O Mariño e Castelao. O resultado foi un aprobado para as dúas primeiras, un sobresaínte para a rúa peonil do Mariño e un suspenso para a rúa Castelao.
Segundo indica o concelleiro de Obras e Servizos, Manuel Ochoa, sobre as rúas Luís Casais, Luís Seoane e O Mariño fixéronse no último ano traballos que permitiron mellorar de xeito notable tanto a iluminación como o aforro enerxético e económico. Cun custo moi baixo, aproveitando os orzamentos que o concello destina a mantemento, conseguiuse rebaixar os consumos destas tres rúas en torno ao 70%, e seguir mantendo a calidade na iluminación.
Para a rúa Castelao, Manuel Ochoa anuncia que se vai atender a demanda da asociación empresarial e que se vai a facer un estudo sobre que tipo de lámpada e potencia son precisas para mellorar a calidade da rúa. “Estase pensando nun aforro do consumo do 30% e nunha mellora da capacidade lumínica do 100%”, valora o concelleiro. Pasaríase das nove lúas actuais a entre 20 e 25 lúas. É dicir, o consumo actual de 300 vatios por punto reduciríase a 200 vatios que, en 18 puntos de luz que ten a rúa, tradúcese nun aforro de 1.800 vatios por hora.
Recordan tamén desde o Concello que sobre a rúa Castelao investiu o anterior goberno máis de 100.000 euros para situar a potencia moi por debaixo da media en rúas comerciais e sen reducir o consumo. Actualmente a potencia na rúa Castelao está en 9 puntos, cando o normal é que sexa de entre 20 e 25. “Agora imos facer máis con menos diñeiro. Cun 10% dese orzamento vaise intentar duplicar a eficiencia enerxética e de iluminación da iluminación da rúa Castelao”, matiza.