O Concello do Grove contrata un orientador laboral con cargo a unha subvención da Xunta de Galicia ata o 31/01/2013
Fecha: 2012-08-14
- Igualmente recórdase que os desempregados do Concello do Grove teñen á súa disposición un Punto de Información para Demandantes de Emprego.
O Concelleiro de Economía, Facenda e Persoal do Grove, Juan Luis Callón Cameán, dentro do programa de difusión da cultura emprendedora e apoio aos desempregados locais, informa que foi contratada unha persoa para realizar as tarefas de Orientación Laboral a través dunha subvención da Consellería de Traballo e Benestar da Xunta de Galicia.
Este servizo, que empezará a funcionar esta semana, estará situado no Edificio de Usos Múltiples situado na rúa Castelao e nel poderase atender os demandantes de emprego incorporados ao Servizo Público de Emprego.
A través do programa de derivación de demandantes de emprego ao citado Servizo de Orientación Laboral, todas estas persoas serán atendidas en entrevistas individualizadas programadas polo citado Servizo Público de Emprego, o que facilitará o acceso, evitando o traslado a Cambados. Con estas entrevistas realizaranse itinerarios individuais e personalizados de emprego con información e orientación profesional, para unha mellora na cualificación profesional e da empleabilidade da persoa demandante.
Con este servizo, o Concello do Grove aumenta os recursos de atención personalizada dos demandantes de emprego, uníndose á Axencia de Desenvolvemento Local que en todo momento veu realizando a atención ás demandas dos distintos usuarios.
A duración do contrato, suxeito á subvención da Xunta de Galicia, será ata o 31 de xaneiro de 2013.
Así mesmo, o alcalde do Grove, Miguel Ángel Pérez, mostrou a súa satisfacción coa concesión da citada subvención xa que nos permite mellorar o servizo que viña prestando o noso ADL nuns momentos de importante desemprego.
Punto de Información para demandantes de emprego
O obxectivo deste Punto de Información é facilitar a comunicación dos demandantes coa Oficina de Emprego adscrita ao citado Servizo.
Ata o de agora, basicamente, o que se viña realizando era a renovación da demanda de emprego a través da pegada dixital. Pero agora desde a dirección de http://emprego.xunta.es, que esta dispoñible no citado Punto de Información que dispón o Concello, pódese acceder coa impresión dixital a varias funcionalidades sen necesidade de se dirixir á oficina de emprego fisicamente, coa conseguinte comodidade de evitar ter que se desprazar ata Cambados. Entre as posibilidades que este Punto de Información lles ofrece ás persoas desempregadas destacan:
- Renovar a demanda de emprego ou reactivar a demanda en determinadas circunstancias.
- Permite ver o currículo, datas de renovación ou citas de orientación laboral.
- Consultar datos persoais e modificar algúns.
- Inscribirse ou consultar ofertas de emprego.
- Solicitar ou consultar cursos.
- Solicitar especialidades formativas.
- Solicitar cita para o Servizo de Orientación Laboral.
- Solicitar a participación en escolas taller e talleres de emprego.
Para máis información, poden dirixirse á Axencia Desenvolvemento Local, no Edificio de Usos Múltiples municipal.