Os nenos despídense da Escola de Verán do Concello do Grove cunha festa

Fecha: 2012-08-31

• Hoxe participaron nunha xincana no recinto do instituto

A Escola de Verán do Concello do Grove clausúrase mañá venres, cunha festa para todos os participantes. Os nenos e nenas gozarán dunha xornada lúdica, con multitude de xogos e animación ao aire libre, cos que despedir o verán e o campamento. Durante toda a semana a escola de verán contou cunha programación especial, cun repaso por todas as temáticas en inglés vistas durante estes dous meses, e que se complementaron con manualidades, lingua de signos e deportes.

A semana comezou cos preparativos do paso da Volta Ciclista a España polo Grove. Os nenos do campamento participaron nun mural que recibiu ao pelotón ao seu paso polo Corgo. O mércores, todos os nenos do campamento gozaron dunha xornada na praia, mentres que esta mañá os maiores participaron nunha xincana nos exteriores do instituto e os grupos de 3 e 4 anos gozaron cunha festa de entroido de verán.

A Escola de Verán do Concello do Grove garantiu, durante os meses de xullo e de agosto, a conciliación de máis de 200 familias da localidade e doutros concellos da comarca. Este programa municipal supón unha alternativa lúdica e de ocio, promovida e supervisada polo Concello do Grove, para gozar das vacacións ao mesmo tempo que se ofrece unha solución aos problemas de compatibilidade dos horarios das familias.

A Escola de Verán contou con filólogos, educadores sociais, profesores de primaria… con alto nivel de inglés e que foron os encargados de convertela nun espazo de diversión para os participantes. Facilitaron que o alumnado se introduza no inglés a través de xogos, cancións e actividades estimulantes para cada grupo de idade, conseguindo que volvan cada día á súa casa coa sensación de que gozaron de experiencias divertidas e diferentes, sen darse conta de que o fan mentres aprenden inglés.