O Concello do Grove programa tres talleres para mellorar as técnicas na busca de emprego
Fecha: 2012-09-19
A formación é un piar importante á hora de mellorar a empregabilidade das persoas en paro, así como unha forma de actualización constante e reciclaxe que permite estar sempre ao día en canto a novidades neste terreo.
O concelleiro de Economía, Facenda e Persoal do Concello do Grove, Juan Luis Callón Cameán, informa que dentro do programa de difusión da cultura emprendedora e apoio aos desempregados locais (e a través da Axencia de Desenvolvemento Local e o Servizo de Orientación Laboral), estanse a programar o desenvolvemento de tres talleres relacionados coa temática da busca de emprego.
Para atopar emprego é importantísimo buscar a diferenciación nos perfís de características e no xeito de levar a cabo a busca de emprego, xa que esa diferenciación é a que leva a acadar o obxectivo de atopar emprego.
Os talleres programados son:
BUSCA EMPREGO NA REDE! constará de 15 horas de duración e terá lugar entre o 24 e o 28 de setembro.
O obxectivo é que aquelas persoas desempregadas que descoñecen Internet e todas as súas utilidades se acheguen a esta ferramenta tan empregada na procura de emprego.
Os contidos para tratar serán:
-
Coñece Internet.
-
O correo web, ¿como crear a túa propia conta de correo?
-
Busca de emprego en Internet.
-
Análise dunha oferta de emprego.
-
As redes sociais 2.0
EMPREGA EN FEMININO constará de 12 horas de duración e terá lugar os mércores do mes de outubro.
O obxectivo é que as mulleres do concello do Grove desenvolvan habilidades sociais para mellorar as súas relacións laborais e persoais.
Os contidos a tratar serán:
-
¿Que son as habilidades sociais?
-
Autocoñecemento.
-
Comunicación verbal e non verbal.
-
Aprendo a ser asertiva.
-
Resolución de conflitos.
TEÑO UNHA IDEA! constará de 12 horas de duración e terá lugar os mércores do mes de novembro.
O obxectivo é que todas as persoas desempregadas do concello do Grove con espírito emprendedor, que teñan un proxecto en mente e non saiban como poñelo en marcha, acudan a este taller para tomar nota dos pasos que se deben seguir para a posta en marcha da súa idea empresarial. Ademais de coñecer as axudas autonómicas e estatais que teñen á súa disposición para facilitarlles o desembolso económico que supón a posta en marcha dun proxecto.
Os contidos para tratar serán:
-
O/ a emprendedor/a e a idea.
-
Facer un Plan de Empresa.
-
Axudas e subvencións autonómicas.
-
Axudas e subvencións estatais.
-
Entidades de apoio ao emprendedor/a.
Así mesmo, o alcalde do Grove, Miguel Ángel Pérez, mostrou a súa satisfacción pola posta en marcha desta iniciativa xa que “é moi importante desenvolver ferramentas que axuden aos desempregados a atopar emprego”.
O número máximo de participantes será de 15 persoas por taller.
Para inscribirse nos talleres hai que entregar unha solicitude na Axencia de Desenvolvemento Local do Concello do Grove. A solicitude pódese recoller na AEDL ou ser descargada desde a páxina web do Concello.