Os nenos convértense en minichefs no taller 'Comer san é divertido'
Fecha: 2013-02-04
Trátase dunha nova proposta para mellorar, de forma lúdica e divertida, os hábitos dos nenos á hora de sentarse á mesa.
Está incluída na guía O Grove Educa.
A Concellería de Educación do Grove inaugurou o pasado sábado pola mañá a actividade “Comer san é divertido–Merendas sas”, na que participan 20 nenos e nenas de 5 a 10 anos. A actividade desenvólvese todos os sábados do mes de febreiro na Casa da Cultura do Grove, en horario de 12.00 a 13.30 horas. Neste primeiro día de taller, os nenos participaron na elaboración de receitas divertidas e sas, entre as que se atopaban batidos naturais de froitas.
“Comer san é divertido–Merendas sas” é unha proposta nova que pretende mellorar os hábitos dos nenos á hora de sentarse á mesa e, de paso, ensinarlles, de forma lúdica e divertida, que a cociña é un traballo para nenas e nenos. Ademais de ensinarlles pequenas receitas entretidas, explícaselle de onde proceden certos alimentos, como se obteñen e, sobre todo, búscase que os participantes sexan receptivos á hora de probar as comidas e que entendan a importancia de ter unha dieta equilibrada.
Algunhas das receitas coas que traballarán os nenos durante este mes son espetadas de froitas con choco-iogur, mel e cereais; batidos; sándwichs de formas; iogur con froita, cereais...; aperitivos de vexetais; piruletas salgadas... Cada semana entregaráselles a receita que elaboren para que a leven á casa, sacaránselle fotos para que os pais poidan ver como os pequenos se converten en minichefs e traballan duro as súas receitas.
Ademais desta actividade extraescolar, desde o Concello do Grove tamén ofertan clases de natación na piscina de Cambados, talleres de técnicas de estudo a actividade “Coñecendo e gozando da biblioteca”. Todas elas están incluídas na guía O Grove Educa que elaborou o Concello do Grove para este curso escolar, co obxectivo de reunir nun mesmo documento toda a oferta educativa e lúdica que as diferentes concellerías organizan para nenos de infantil, primaria, secundaria e bacharelato, ben sexa en actividades fóra do horario escolar ou en colaboración cos propios centros. En colaboración cos centros, xa se organizaron algunhas actividades, como a xornada Maxia Potaxia, talleres de igualdade, de primeiros auxilios e clases de educación viaria.
Concurso de Relatos Curtos
Por outra banda, desde a Concellería de Educación recordan que continúa aberto o prazo para participar no II Concurso de Relatos Curtos, destinado ao alumnado de bacharelato e de segundo ciclo da ESO que estea matriculado nalgún dos centros da localidade. O obxectivo que se persegue coa convocatoria deste concurso é motivar os estudantes dos últimos cursos na escritura creativa e no gusto pola lectura. Os premios en cada unha das dúas categorías será a publicación do relato na revista local Sustansia do mes de abril, coincidindo coa celebración do Día do Libro e do Día do Libro Infantil; cen euros en cheques regalo para gastar no comercio local e un lote de libros.
Os traballos deberanse entregar no propio centro escolar ata o 28 de febreiro. O ditame do xurado farase público a primeira semana de marzo e a entrega de premios terá lugar o día 2 de abril, coincidindo coa conmemoración do Día do Libro Infantil.