Magnífica acollida do programa Bibliofamilia entre as familias grovenses

Fecha: 2013-04-28

Noventa nenos e nenas, acompañados doutros tantos familiares, participaron nas 4 actividades organizadas

O programa Bibliofamilia, organizado pola Rede de bibliotecas do Grove, tivo unha extraordinaria acollida entre as familias grovenses. Nada menos que 90 nenos e nenas, acompañados duns 100 familiares, participaron nas actividades propostas. O persoal da Rede de bibliotecas tivo que ampliar o número de participantes en cada actividade e, a pesar diso, houbo lista de espera en todas.

Estas actividades, dirixidas ás familias consisten, basicamente, en que os membros da unidade familiar poidan gozar co pracer da lectura e de facer diferentes actividades xuntos, deste xeito pais, avós, tíos… e nenos descubran, experimentan e gozan xuntos cos contos, a creación artística, ou os traballos manuais. Realizáronse na biblioteca municipal do Grove os catro sábados de abril a partir das 11.30 h e as prazas eran limitadas, polo que foi necesario a inscrición previa.

A actividade Agora que vai pasar? pechou este ciclo de actividades coa posta en escena dun conto teatral e musicado, unha maridaxe entre a narración, a música en directo e a intervención do público asistente. Nesta ocasión correu a cargo do propio persoal da biblioteca que se encargou de todos os detalles, desde a realización e decoración do escenario ata a narración e a posta en escena, contando coa axuda de varios colaboradores para a música, a tradución e a gravación do evento.

A diversidade das actividades propostas xunto coa grande implicación e participación dos familiares na realización destas, foron os puntos clave do seu éxito. O que  contribuíu a crear unha gran demanda deste tipo de actividades: son moitas as peticións que estamos a ter de repetir ou realizar novas actividades, tanto por parte dos que participaron en algunha delas, como de aqueles que se quedaron fóra por falta de prazas.