'Pedaladas polo recordo', marcha cicloturista en homenaxe ás vítimas e aos voluntarios do sinistro de Angrois

Fecha: 2013-08-20

Baixo o lema ‘Pedaladas polo recordo’, o venres 23 de agosto a Deputación de Pontevedra e Unipublic promoven unha marcha homenaxe ás vítimas do sinistro de Angrois e ás que o deron todo por axudar. Deste modo, reorganizarase e cambiarase a filosofía da ‘Etapa de la Vuelta' que estaba pensada como unha marcha cicloturista para profesionais e semiprofesionais cun custo de inscrición de 20 euros. Agora pasa a ser unha actividade de carácter gratuíto na que os participantes lucirán camisetas en lembranza dos afectados polo accidente ferroviario de Santiago de Compostela.

Así mesmo e co obxectivo de que se poidan sumar a esta homenaxe o maior número de persoas posible, ademais da marcha prevista inicialmente —de 130 quilómetros de lonxitude con saída no porto de Vilanova de Arousa e chegada ao monte Lobeira (9.30 horas)—, organizarase outra cun percorrido máis curto e sinxelo orientado a familias con nenos e a ciclistas afeccionados. Esta contará cun percorrido de sete quilómetros que sairá igualmente do porto de Vilanova de Arousa, aínda que unhas horas máis tarde (sobre as 12.00 horas). O obxectivo deste inicio máis tardío é que os participantes dos dous percorridos poidan estar unha vez máis no porto de Vilanova á mesma hora, para celebrar un acto de convivencia co que rematará a marcha.

Por último, os participantes terán a oportunidade de ver in situ a zona de saída inédita da Volta a España, que será desde unha batea, e posteriormente ofreceráselles a todos una comida tamén de balde.

As inscricións só serán necesarias para a marcha longa (pódese inscribir premento nesta ligazón>). Para a curta simplemente será preciso estar na saída ás 12.00 horas.

Os dorsais e camisetas poderanse retirar o xoves 22 de agosto, entre as 18.00 e as 21.00 horas, no porto de Vilanova de Arousa.