A obra 'No Grove', de Miguel Anxo Macía, gaña o I Concurso de Pintura Ernesto Goday, organizado pola Concellería de Cultura

Fecha: 2013-12-21

(Obra gañadora)

A gran calidade das obras presentadas levou o xurado a conceder tres accésits

Na tarde do xoves 19 de decembro tivo lugar na Casa do Concello a xuntanza dos membros do xurado do I Concurso de pintura Ernesto Goday, organizado pola Concellería de Cultura do Concello do Grove, para ditaminar a obra gañadora desta primeira edición.

O xurado estivo integrado por José María Barreiro, pintor; Josebe Arrillaga Chopitea, doutora en Belas Artes;  Clara María Martínez Vindel, licenciada en Belas Artes e José Ángel Rodríguez López, Gogue, debuxante.

Despois de deliberar, o xurado acordou declarar gañadora da presente edición a obra presentada co título “No Grove”, de Miguel Anxo Macía, realizada coa técnica de óleo sobre taboleiro e cunhas medidas de 60 x 150 cm.

A gran calidade das obras presentadas dificultou enormemente a decisión do xurado, que optou por conceder, ademais do primeiro premio, tres accésits para as obras:

• “Marusía”, de José Miguel Besada Costa
• “Bruce Nauman camiña de forma esaxerada por una batea”, de Diego Vites García
• “Lara no Espiño”, Carlos Álvarez Besada

As catro obras premiadas, xunto coas outras quince presentadas a esta primeira edición do concurso, permanecerán expostas na planta baixa da Casa do Concello ata mediados do vindeiro mes de xaneiro.

 (Primeiro accésit)

(Segundo accésit)

(Terceiro accésit)